Your Beauty Value..

السلام عليكم..

كيف حالكم؟ وحشتوني..

اليوم ابا اتكلم عن موضوع مختلف عن الريفيوز و الهولز و المفضلات..

ابا اتكلم في اسعار الميك اب..

اول شي احب اقولو انو يمكن نص مكياجي من الف.. و الي ما يعرف الف.. هيا ماركة اسعارها رخيصة مقارنة بجودتها..

بس في شي كتير ناس ما يفهموه انو اسعار الشحن من امريكا لعندي يمكن بضعف سعر البضاعة و يمكن اكتر كمان!

المهم ما اختلفنا..

استغرب من البنات الي تقيم جمالها باسعار مكياجها..يعني لو البودرة من ديور حتكون كشخة و لو البودرة من بودي شوب كخه؟

صحيح بودرة ديور من مفضلاتي بس ماعمرها تقيمني او تعنيلي شي.. و الاسعار مهي بعيدة مرا زي الاجانب!

يعني فاونديشن لوريال بمية و زيادة و فاونديشن هاي اند من ١٥٠ و فوق.. مو داكا الفرق!

الوحدة تختار المكياج الممتاز الي يريحها في الاستعمال و يكون فيه المواصفات الي هيا تبغاها بعيدا عن السعر..

لو في عجبك من شانيل مثلا.. اشتريه

لو شي عجبك من نيكس.. اشتريه

عادي يكون عندك ميكس بين الهاي اند و الدرق ستور..

و ابدا مو عيب انك تستعملي ماركات الدرق ستور.. ازا انتي مرتاحة عليها و واثقة من نفسك.. قو اهيد..

كمان حاجة.. في بنات من الي ماعندهم خبرة و ما يدورو في موضوع المكياج.. تدخل مثلا فيسز و تقول ابا روج احمر..

و بما انها مهي فاهمة حتشتري اي شي باي سعر (كلامي واقعي) و لكن ازا كانت فاهمة و بكامل ارادتها و اختيارها عارفة انو الروج الاحمر من الماركة الفلانية (في الهاي اند) افضل من الروج الاحمر من الماركة الفلانية (درقستور) في هادي الحالة ما تنلام..

مدري احس كلامي معقد فاهمين عليا؟ ههههههه

و بعيدا عن كل دا.. حابة اقولكم في وجهة نظري متى المنتج يستحق انك تصرفي عليه و متى ما يستحق..

بس في البوست الجي ان شاءالله 

(كتبت و تعبت و انمسح عليها هههههه)