My Favorite Elf Products! p3

و تكملة لمنتجاتي المفضلة من ماركة " الف "..

11- Elf bronzer&blush
هادي المنتجين ما اقدر استغنى عنهم.. احبهم مرا مرا..
سواءً الكريمي او البودرة..
الكريمي سهل في الدمج و يعطي لمعة صحية و في نفس الوقت مافيه اي شيمر..
و البلشر الي في الكت الكريمية جداً طبيعيي و جميييييل..
أما البودرة.. فالبرونزر جدا جميل للكونتور.. لونو مو مرا اورنج.. و مو مرا رمادي..
بين الإتنين و دا الشي الي ابغاه بالزبط.. احيانا يكون غامق عليا لكن مع الدمج يطلع مية مية..

12-Elf Highlighters
OMG.. لا تخلوني ابدأ اتكلم عنهم..
المنتج الي عاليمين منتج ما اعتقد يمشي يوم بدون ما استعمله.. افضله على كل الهايلايترز الي عندي.. درق ستور او هاي اند.. رخيص او غالي.. يبقى دا الهايلايتر المفضل عندي.. يعطي لمعه جداً جميلة و صحية و مافيه قلتر.. يعني يعطي لمعه بدون ما تبان حبيبات الشيمر.. و دا من الأشياء المهمة عندي في الهايلايترز.. لونه صدفي على نتفة بنك..
و المنتج الي عاليسار لونه ابيض على دهبي.. يعطي لمعه صحية و خفيفة.. و نفس الشي ابدا ما يبين حبيبات الشيمر و ما يبين تو متش.. يعني جداً طبيعي..

13-Elf Glitter Eyeliners
ايلاينرز فيها قلتر.. الصراحة حلوة مرا و اغنتني عن ايلاينر القلتر من اي ماركة تانية..
عندي من فترة و ما نشفت الحمدلله.. الوانها حلوة.. ممكن استعمل الفرشة مع قلتر من عندي .. يكون لوس.. و يزبط مية مية..

14-Elf Cream Eyeliner
ايلاينر على هيئة جل.. احبه عشان قوامه تقيل و سواده فاحم.. و ما نشف مع العلم انه عندي من اكتر من سنة..
فيه كمية كبيرة جداً و تكفيكي وقت طويل حتى لو كنتي من الي يرسمو ايلاينر بشكل يومي..
غالباً لما استعمله اثبته باللون الأسود من اربن ديكاي.. حتى ازيد سواده.. لكن قد جربته كثير بدون تثبيت و مافي اي مشكلة..

15- Elf Baked Eyeshadow Palette
بشكل عام المنتجات المطبوخة او المضغوطة بالنسبالي عشق..
احب استعمل الايشادوز و هيا رطبة..
و الباليت زي ما تشوفه انه مسهتلك بشكل كبير هههه..
الوانه جدا تساعد في اشياء كتير.. الاسود لما يكون رطب يكون ايلاينر جداً جميل..
و البني استعمله لحواجبي من فترة طويييلة.. و باين مكان الفرشة فيه هههه..
و الالوان الفاتحة تنفع للجفن او لهايلايت.. اللون الأزرق ينفع يكون لون مميز او فاقع في اللوكات بشكل عام..
و دا كمان يبين قد ايش احب الايشادوز السنقل البيكد من الف في الصورة الجيا..

16- Elf Single Eyeshadows
هادي الايشادوز من جد من افضل الايشادوز الي جربتها في حياتي كلها..
ما ابالغ لما اقول جودتها قريبة من شادوهات اربن ديكي.. صراحة مرا مرا فظيعة و الوانها جميييييلة جداً..
تستعمل و هيا رطبة برضو و تعطي نتايج خيال..
و ان شاءالله في ريفيو بتفاصيل حانزله قريب..


و بس..
انا حاولت اقلل من المنتجات قد ما اقدر عشان ما اطول عليكم.. لكن شكلي طولت هههههه
والله لو اقدر .. حاتكلم عن اشياء كتير و حاسوي زحمة.. فاخترت المنتجات الي اتمنيت اني اشتريتها من اول مرة
او اتمنيت انو احد قلي عليها اول مرا اشتري من الف عشان يساعدني..
بالنسبة للمنتجات " السيئة " من الف تنعد عالاصابع.. لكن برضو ان شاءالله اسوي بوست كامل عنها..
و اخيرا قبل ما ابدأ في اسئلة البنات ابا اقول انه مو شرط كل المنتجات الي تعجبني تعجبكم.. هادا رأيي الشخصي..

اسئلة النبات بسيطة جدا لو حابين تعرفوها كملو قراية و لو مو حابين اكيد حاشوفكم في البوست الجي ان شاءالله ههههه..

من الاسئلة انو من فين تقدرو تشتروها..
من موقعهم www.eyeslipsface.com
او من التاجرات في انستقرام..
موقعهم يحتاج انو يكون عندك بريد في امريكا..

ايش الفرق بينها و بين باقي الماركات..
الف سعرها رخيص مقارنة بباقي ماركات الدرقستور التانية..
لو فكرتو فيها فاونديشن من الف ب6 دولار تقريبا من دون الشحن و لو اشتريتي فاونديشن من لوريال حيكون سعره 102 ريال..
ففي فرق!
لو اشتريتو هايلايتر نارس البتروس حيكون ب30$ و هايلايتر الف ب3$! ما يحتاج اتكلم اكتر اعتقد ههههههه

الايشادوز الكريمية تنشف بسرعة او لا؟
من تجربتي ابدا ما تنشف بسرعة.. لكن انا احافظ عليها بإني ما اخليها مكشوفة.. احاول اغطيها بقد ما اقدر..

و بس اعتقد كدا غطيت معظم الأسئلة.. لو عندكم اسئلة اكتبولي هيا في كومنت في انستقرام او عالدايركت ( الخاص ) في انستقرام برضو..

و بس..
ان شاءالله يكون البوست عجبكم..